البوست السادس والأخير من سلسلة مربى الدواجن الناجح للمبتدئين

• 
• السلام عليكم ورحمة الله
  **** البوست السادس والاخير من سلسلة ازاي تكون مربي ناجح ****
  
  البوست دا مهم جدا جدا. ولكن مبدئيا احب انوه للاخوه الزملاء الافاضل والمختصين من عنده معلومه او تعديل او شيئ يتكرم بطرحه ولا حرج ف ذلك ولتعم الفائده للمربي ولي انا كذلك فكلنا نتعلم وسنظل نتعلم.
  
  انتهينا في البوستات الي فاتت عند عمر 26 يوم وكان اخر كورس اديناه هوا مضاد الكوكسيديا والكلوسترديا ،
  
  طيب ايه النقاط الي اخد بالي منها بعد كدا؟
  
  هتاخد بالك ان نمو حجم الفرخ اسرع في الاسبوع دا بالاخص لو انتا شغال كويس هتلاقي معامل التحويل بيوصل 1.5 ودا معامل قياسي جدااا يعني بالبلدي لو اكلت 2 كيلو علف هتلاقي متوسط وزنك تقريبا 1.250 في عمر 25 يوم.،
  
  المهم المقصود من الكلام دا انك تاخد بالك ان الفرخ في الفتره دي هيحتاج كمية اكسجين اعلي من الفترات الي فاتت وان قلة التهويه هتعملك حالات استسقاء وكمان هتنشط الميكوبلازما والاي كولاي...
  
  العشر تيام الي جيين دول التهويه ثم التهويه ثم التهويه وعشان اطمنك اكتر، طول مالفرخ تكوين ريشه اكتمل ماتقلقش من نزول درجة الحراره حتي لو نزلت درجتين تلاته بس اهم حاجه تهتم بالتهويه.
  
  طيب هل استخدم اي ادويه من بعد عمر 26 يوم؟
  
  نصيحتي ليك ماتستخدمش اي مضادات حيويه طول مالقطيع ماشي معاك كويس لاني بعتبر المضاد الحيوي دا لوحده اجهاد. الا لو استدعي الامر، طب استخدم ايه؟
  
  هتستخدم من يوم 26 لغاية البيع مضاد سموم فطريه يوم اه ويوم لاء هنستخدم اي منتجات للبروبيوتيك، الخماير، الفيتامينات، الغسيل الكلوي، بمعني اصح اي منتج يساعد الفرخ علي التخلص من السموم الي بالجسم ويساعد علي فرز اكتر لانزيمات الهضم وينشط المناعه لمقاومة البكتريا.
  
  طيب هل هلاقي مشاكل ممكن تقابلني ف عمر 28 يوم ونا طالع؟
  
  ايوه هتلاقي طبعا. لو انتا اتاثرت بالميكوبلازما ممكن تلاقي حالات عرج ودي ناتجه عن ميكوبلازما سينوفي اي اجهاد علي الكلي برده هيعملك حالات عرج.. لو الحالات دي فرديه اعزلها واستمر لو لاقتها زياده لازم تزود التهويه شويه عن الي انتا شغال بيه..
  كمان بعد عمر 30 يوم هتلاقي ظهور للكوكسيديا او الكلوسترديا..
  
  هقولك علي حاجه كنت بسميها المنقذ
  
  كنت ديما لما الاقي الكلوسترديا او الكوكسيديا هيشتغلوا ف العمر ده ودول اسمهم حرامية الوزن كنت بجيب كبريتات نحاس ( جنزاره) وكنت بفكها بميه سخنه لدرجة الغليان وكنت بجيب خل مركز 96% وكنت بحط نص سم كبريتات نحاس وواحد سم خل لكل لتر ميه جرعه 6 ساعات وكنت بلاقي الكوكسيديا والكلوسترديا انتهت تماما بعد انتهاء الجرعه بس خد بالك ماتستخدمش الكبريتات دي غير مره وحده بس. المهم كنت بكمل باقي الايام خل خام ومضادات سموم....
  
  طيب السؤال الاهم بقا ازاي احقق اعلي معدل وزن؟
  
  بص يا سيدي مبدئيا لازم تطبق برنامج الاظلام ساعتين يوميا وابداء من عمر 12 يوم علشان يكون الجهاز الهضمي اكتمل تكوينه، شركة زوص عملت اختبار حقلي هنزله ف بوست لوحده ان شاء الله عن الاظلام لمدة ساعتين يوميا ووجدت ان اعلي معدل تحويل واقل وفيات حققته 22 ساعه اضائه و2 ساعه اظلام
  عشان اكمل صح في موضوع الوزن احافظ علي صحة الفرخ،
  
  استعمل الخماير والبروبويتيك والبروبايوتيك لانهم بيزيدو من مساحة الخملات في الامعاء وبيحسنوا من الفلورا المعويه وبالتالي زياده في فرز انزيمات الهضم وبيحصل اعلي معدل تحويل وقتها.
  
  واخيرا وليس اخرا. الواجن علم وليس ماء وعلف فالبعلم نعلوا ونتقدم...
  
  خليك مربى ناجح